Беларускі падкаст пра экалагічны лад жыцця «Еще теплее» ад Школы «Экаідэі» зайшоў на другі сезон. Слухач_кам новага эпізоду прапануюць далучыцца да марской экспедыцыі па прыборцы пластыкавага смецця.
Аднойчы вядучая новага сезона Маша Гуліна – журналістка і экаактывістка, якая любіць упісвацца ў міжнародныя экаварушнякі, – разам з іншымі энтузіяст_камі выправілася да пляжаў южнага ўзбярэжжа Англіі, каб зрабіць іх чысцейшымі. Цымес гэтай экспедыцыі ў тым, што яна адбывалася на сапраўднай стогадовай рыбалоўнай шхуне.
Фота – Susan Jonusas
Для «Еще теплее» Маша заміксавала палявыя запісы, фрагменты інтэрв’ю з суаўтарам ідэі, свае разважанні наконт такога досведу. З падкаста ты даведаешся, як каманда шхуны забіраецца ў цяжка дасяжныя лакацыі; што там знаходзіць; куды прыладжвае свае пластыкавыя «скарбы» (у рабят вельмі ўдумлівы падыход); заадно паслухаеш, якая зараз увогуле сітуацыя па пластыку ў дзікай прыродзе.
Далей у шоу плануецца абмяркоўваць як штодзённыя дзеянні, якія дапамагаюць рабіць жыццё экалагічна прыязным, так і глабальныя сістэмныя змены, якія патрэбны, каб прадухіліць кліматычны крызіс. Анансаваныя топікі: узаемасувязь змены клімату і сацыяльнай справядлівасці, эка-арт і экафемінізм, важнасць камунікацыі і выклікі экапрыязнага бацькоўства. А пакуль чакаеш на новыя эпізоды, варта паслухаць першы сезон, дзе вядучая Каця Арчакова разам з эксперт_камі разважала пра «зялёную» мабільнасць, адказную моду, экалагічнае святкаванне прыемных жыццёвых нагод і эканамічную нявыгаднасць шкоды прыродзе.
Слухай «Еще теплее» на Anchor, Apple Podcasts, Google Podcasts, Яндекс.Музыка, Castbox.
Саўнддызайн праекта «Еще теплее» робіць твой улюбёны Беларускі Падкаст Хаб.
Text by Zamandarin